Dy nga liderat botërorë Donald Trump dhe Vladimir Putin po zhvillojnë një takim të përbashkët në Finlandë.
Takimi kokë më kokë mes presidentit rus dhe atij amerikan sapo ka nisur në pallatin presidencial Helsinki dhe synon rindërtimin e marrëdhënieve mes SHBA dhe Rusisë.
Samiti në Helsinki përbëhet nga një takim kokë më kokë, drekë pune dhe do të përfundojë me një konferencë të përbashkët të shtypi.
Takimi po zhvillohet në kushte të vështira, vetëm pak ditë pasi Departamenti i Drejtësisë paditi 12 agjentë të inteligjencës ruse për akuzat për sulmin ndaj Komitetit Kombëtar Demokratik dhe fushatës presidenciale të Hillary Clinton.
Por Trump fajësoi Shtetet e Bashkuara për tensionet midis vendeve dhe jo Rusinë.
Trump para takimit, vlerësoi Putin për mënyrën e organizmit të Kupës së Botës.
Presidenti amerikan u shpreh se ata do diskutojnë për çdo gjë, nga tregtia në ushtri deri te raketat bërthamore, për Kinën etj.
Ndërsa përsa i përket marrëdhënies midis dy vendeve, ai tha se dy vendet kanë mundësi të mira së bashku.
Por një nga çështjet që nuk do të trajtohet është ndërhyrja ruse në zgjedhjet e vitit 2016 në SHBA, që kritikët i quajtën akt lufte.
