Vetëm një vaksinë efektive kundër koronavirusit mund të “ndërpresë plotësisht transmetimin” e sëmundjes në të gjithë botën, tha kreu i Organizatës Botërore të Shëndetit (OBSH), raporton BBC.

Tedros Adhanom Ghebreyesus tha në një konferencë për media se “lidhja” që kanë shtetet në botë me njera tjetren nënkupton që rreziku i riaktivizimit të Covid-19 do të vazhdojë të jetë real.

“Në fund të fundit, zhvillimi dhe shpërndarja e një vaksine të sigurt dhe efektive do të jetë e nevojshme për të ndërprerë plotësisht transmetimin,” tha Dr Tedros.

Shumica e ekspertëve thonë se një vaksinë që u jep njerëzve imunitetin ndaj koronavirusit nuk do të zhvillohet dhe prodhohet në masë për të paktën një vit.

Ndërsa disa vende konsiderojnë heqjen e kufizimeve të distancës sociale, kreu i OBSH, Tedros paralajmëroi që të mos e bënin këtë derisa të “zënë vend masat e duhura për shëndetin e qytetarëve”.