Shqipëria ka nisur t’u pëlqejë qytetarëve nga vendet e treta të Botës. Ndërsa sfida e Shqipërisë që nga vitet 1990 është të bëhet një vend i ngjashëm me ato të vendeve të Bashkimit Europian, sot pas 28 vitesh, keqqeverisja po e rendit vendin në preferencat e sirianëve, egjiptianëve dhe libanezëve.

Statistikat zyrtare tregojnë se mbi 1000 emigrantë, shumica e tyre nga Siria kanë kërkuar azil në Shqipëri gjatë 5 muajve të parë të këtij viti.Ky numër është dyfish më i lartë se i gjithë viti 2017. Emigrantët ilegale janë strehuar në qendrën e pritjes në Kakavijë, në Gërhovë të Gjirokastrës, në Kareç dhe tek ajo e azilkërkuesve në Babrru. Te kjo e fundit nuk ka më vende për pritjen e tyre.

Sot, Shqipëria është shndërruar edhe në vendin ku po lulëzon trafiku i qenieve njerëzore. Autoritetet shqiptare pranojnë aktivizimin e trafikantëve që ndihmojnë emigrantët për kalim në vendet e BE. Mes tyre ka edhe efektive të policisë kufitare.