Situata për Shqipërinë në këtë moment të rëndësishëm për negociatat sa po vjen dhe po komplikohet më shumë. Italia, e cila konsiderohet nga politikanë të të dyja shteteve si ‘avokate’ e Tiranës në këtë proces, duket se është distancuar në përpjekjet për të ndihmuar vendin tonë në hapjen e negociatave në muajin qershor.

Ambasadori italian, Albert Cutillo ka deklaruar së fundmi se i takon Qeverisë dhe popullit shqiptar që për këtë periudhë që ka mbetur të ndryshojë idenë e atyre shteteve që janë skeptike. “Shumica e shteteve kanë dhënë opinionin e tyre pozitiv dhe kush akoma është duke menduar ndoshta mund të ndërrojnë edhe ide. Gjithsesi i takon qeverisë dhe popullit shqiptar për këtë periudhë që kanë mbetur të ndryshojnë idenë e atyre që janë skeptikë.  Mes opozitës dhe qeverisë ka kontraste, por është e rëndësishme që gjithsesi të gjejnë të përbashkëtën e objektivit që na pret”, është shprehur Cutillo.

Me këtë distancim të Italisë, Shqipëria duket se ka mbetur pa një ‘avokat’ të fuqishëm brenda BE-së, ku duhet të përballet me shtete si Gjermania, Franca dhe Holanda.