Kreu i PDK, Nard Ndoka ka zbuluar në “45 minuta” në Report Tv se Lulzim Bashën e informuan partnerët ndërkombëtarë për automjetin “Toyota Yaris” të ngarkuar me 3.4 mln euro, i cili pritej të mbërrinte në Portin e Durrësit.

Ndoka thekson se nëse Basha nuk do kishte folur në Kuvend, shuma e konsiderueshme e eurove të trafikut do kishte filtruar në Shqipëri. Ai foli edhe për dy dërgesa të tjera parash të cilat kanë hyrë në tregun shqiptar, ndërsa policia nuk ka mundur t’i bllokojë për shkak të ndërhyrjes së politikës.

“Nuk është shumë e rëndësishme se cila është rruga e informimit. Mesa informacione unë kam, janë partnerët ata të cilët kanë informuar. Ka pasur një shqetësim, se policia e shtetit bashkëpunon me grupet kriminale apo dhe se politika është e lidhur deri në kupolën e saj. Ka pasur edhe raste të tjera kur policia ka qenë në dijeni dhe i ka lejuar të futeshin.

Ky operacion po ndiqej edhe nga partnerët e huaj, të cilët po shoqëronin automjetin dhe i kishin bërë të ditur palës shqiptare nëpërmjet informacionit zyrtar, por duke qenë një rast i përsëritur, pasi herën e parë kishin dështuar, ata kishin qenë më të fortë se drejtuesit e policisë, herë e dytë për të frenuar dështimin, u dha edhe një informacion më i plotë.

Ka informacione që ka ndodhur edhe një apo dy herë të tjera futja e parave, policia ka qenë e informuar dhe nuk ka ndërhyrë. Kjo ka detyruar partnerët ndërkombëtarë që t’i japin informacion opozitës.” ka treguar Nard Ndoka.

Ndërsa i pyetur për akuzat e Bashës ndaj kreut të grupit parlamentar socialist, Taulant Balla, Ndoka tha se nuk ka informacione nëse kreu demokrat ka prova për to.

“Nuk e di, nuk kam informacion të tillë për akuzën e drejtpërdrejtë ndaj Ballës. Nuk e di a ishte emocionale, e momenti, apo një informacion i qartë i z.Basha edhe me emër. Këtë do t’ia lëmë kohës. S’kam pasur kontakte ditët e fundit me z.Basha. Edhe z.Berisha tha në parlament për një avion në Divjakë me drogë dhe të gjithë qeshëm, por doli se ishte e vërtetë pastaj.” u shpreh kreu i PDK-së.