Nëse mendojmë se bandat e kanabisit janë te parcelat, aty ku mbillet fara dhe vaditet bima narkotike këtë e kemi gabim. Historia e Alket Muhos, të riut nga Memaliaj që denoncoi parcelën me kanabis na tregoi edhe njëherë se trafikantët janë në zyrat e shtetit e jo aty ku arrestohen vaditës, pleh hedhës apo transportues të punëtorëve. Alket Muho, kishte vendosur që të tregonte se në zonën e Memaliajt kanabis vazhdohej të mbillej.

E për të mos dalë emri i tij dhe për të mos u tradhtuar, 43-vjeçari nga fshati Rabije i Memaliajt nuk do të denonconte në Policinë e Tepelenës, sepse aty e dinte që emri i tij do të bëhej publik brenda pak minutash.
Muho do të denonconte në Tiranë në atë që njihet si Shërbimi i Çështjeve të Brendshme dhe Ankesave.

Tek policia që heton policinë, Alket Muho do të denonconte se në fshatin e tij dhe zonat përreth po mbillej kanabis. Por edhe këtu, denoncimi i tij nuk do të qëndronte sekret.
Emri i tij do të bëhej publik për strukturat e policisë, por jo vetëm për ta. Policia do ta tregonte emrin e Alket Muhos edhe tek trafikantët e kanabisit. E nuk do të kalonin shumë ditë. Vetëm 10 ditë do të kalonin nga denoncimi, kur Alket Muho do të ekzekutohej në tokën e tij jo shumë larg shtëpisë në fshatin Rabije.

Alket Muho, i riu që u vra pse denoncoi parcelën me kanabis