Deputetja e Partisë Demokratike në qarkun e Vlorës, Nada Meçorapaj, ka reaguar pas projektligjit të shqyrtuar sot në Kuvend sa i takon dëmshpërblimit të ish të përndjekurve politikë.

Në një status në rrjetin social Facebook, Meçorapaj thotë se heqja e dëmshpërblimit për këtë kategori, është e pafalshme sidomos në kohën kur mazhoranca po bën shpenzime të mëdha për ekspozita, fasada, udhëtime, apo koncensione multimilionëshe.

Deputetja demokrate thekson se rehabilitimi dhe dëmshpërblimi i të dënuarve politikë është përparësi e programit të Partisë Demokratike.

Postimi i plotë

RIDENIMI NGA RILINDJA I TE PERNDJEKURVE

Paraqitja sot në Kuvend, në një institucion të njëanshëm, të kapur dhe totalitar, siç është shndërruar Kuvendi i ‘Rilindjes’, e projektligjit “Për disa shtesa dhe ndryshime në ligjin nr. 9831 “Për dëmshpërblimin e ish-të dënuarve politikë të regjimit komunist”, është një ridënim dhe atentat që i bëhet shtresës së të dënuarve politikë në Shqipëri. Heqja e dëmshpërblimit për këtë kategori, ende të parehabilituar, është e pafalshme, sidomos e tillë në epokën e shpenzimeve marramendëse për ekspozita, fasada, bojra, udhëtime, koncerte, shkrime të paguara në mediat e huaja, honorare të larta për këshilltarë të huaj, koncensione multimilionëshe të dhëna privatit etj.

Pa folur për hajdutët me çizme të administratës.

Partia Demokratike, siç tha kryetari i opozitës Basha, do ta anullojë këtë ligj, që do kalohet sot me shumicë të thjeshtë, që ditën e dytë në pushtet. Rehabilitimi dhe dëmshpërblimi i të dënuarve politikë është përparësi e programit të Partisë Demokratike.

Ne, sigurisht,, kemi një ndjesë për të kërkuar në raport me ish-të përndjekurit dhe ish-pronarët, edhe pse kemi bërë çmos për t’ konisderuar si partnerë dhe për t’a shtyrë përpara agjendën dhe detyrimin ndaj tyre.