Kryetari i Grupit të Miqësisë me Shqipërinë në Senatin Amerikan, Senatori Demokrat Gary Peters, priti në takim Presidentin e Republikës së Shqipërisë, Ilir Meta.

Presidenti Meta e falënderoi Senatorin Peters për lidershipin e tij në Senatin e SHBA në dobi të forcimit të miqësisë me Shqipërinë dhe për mbështetjen e tij për komunitetit shqiptar në shtetin e Michigan-it.

Meta kërkoi mbështetjen e Senatorit Peters për marrëveshjen e heqjes të taksimit të dyfishtë midis dy vendeve, që do të sillte lehtësira në fushën e tregtisë dhe investimeve.

Senatori Peters shprehu kënaqësinë për takimin me Presidentin Meta dhe njëkohësisht angazhimin për të kontribuuar në rritjen e vëmendjes në Senatin e SHBA për forcimin e mëtejshëm të marrëdhënieve midis dy vendeve tona.

Postimi i Presidentit Meta në Facebook:

Ishte kënaqësi të takoja Senatorin amerikan, Gary Peters dhe ta falënderoja për angazhimin në forcimin e marrëdhënieve mes Shqipërisë dhe SHBA në Senatin amerikan. Mirënjohës për kontributin e tij për komunitetin shqiptar në Michigan.🇦🇱🤝🇺🇸