Afrim Qendro, kreu i Autoritetit Rrugor shqiptar është vënë në krye të punës, që qeveria ka nisur për të nxjerrë nga banesat e tyre, qindra familje në zonën e “Astirit”, ku pritet të ndërtohet edhe Unaza e Madhe.

Por, duket se Qendro nuk e ka për herë të parë marrjen e flamurit për të ndëshkuar banorët e Tiranës, pasi këtë e ka bërë edhe më herët.

Nga raportimet që janë bërë disa kohë më parë në media, mësohet se Qendro është dënuar me gjashtë muaj burg, pasi ju vërtetua edhe gjyqësisht se kishte qenë fajtor në hapjen e portave të digës së Liqenit Artificial në Tiranë.

Veprim ky që solli përmbytjen e kryeqytetit, dhe një dëm të pakrahasueshëm financiar tek qytetarët.

Qendron, mësohet se në atë kohë ka qenë drejtor i Ndërmarrjes numër 1 në Bashkinë e Tiranës, për gjelbërimin, dhe në këtë cilësi zyrtari doli i përfshirë në veprën penale.

Ka qenë prokurori i Antiterrorit në Prokurorinë e Përgjithshme, Zamir Shtylla, që ka urdhëruar prangosjen e Fisnik Vathit, me profesionin inxhinier, Sotiraq Selenicës, me të njëjtin profesion, të dy përfaqësues të firmës ndërtuese “Triss”, të drejtorit të Ndërmarrjes së Gjelbërimit, Afrim Qëndro, dhe rojes së digës, Ilir Lulja.

Që të gjithë të dënuar me vendim të formës së prerë. Megjithëse Afrim Qendro nuk e ka marrë pafajësinë në asnjë rast, dënimi me burg nuk e ka ndalur të emërohet në krye të Autoritetit të Rrugëve, me firmën e Ministrit të Energjisë dhe Infrastrukturës. Ka ndodhur kjo megjithëse është në fuqi veprimi ligji i dekriminalizimit i cili e ndalon një veprim të tillë.

Madje, vetëm pak ditë më parë, ishte gazetari Ylli Raki i cili pranoi se Edi Rama i kishte thënë atij që të thoshte që Tiranën e kishte përmbytur një budalla.

Duket se shpëtimi që i ka bërë Afrim Qendros nga burgu dikur Edi Rama, ka sjellë që edhe ai të marrë përsipër prishjen e ndërtimeve dhe nxjerrjen e shumë qytetarëve në rrugë të madhe.