Partia Demokratike kërkon mandatin e deputetit të kryeministrit Edi Rama duke e bazuar këtë në hapjen e ekspozitës së tij në Berlin, Gjermani, sipas opozitës në shkelje të ligjit.
Deputetja demokrate Albana Vokshi tha se shumica e shqiptarëve jeton shumë më keq por kryeministri as nuk do t’ia dijë. Ajo tha se Edi Rama e ka braktisur detyrën për të hapur një ekspozitë në Berlin.

“Në këto ditë të ftohta Tirana dhe disa qytete të vendit janë përballur me ndërprerjen e energjisë elektrike. Studentët janë ende në bojkot me kërkesa minimale të parealizuara nga qeveria. Fatura e ujit ka ardhur edhe më e lartë këtë muaj nga futja e një takse të re. Shumica e shqiptarëve jeton më keq, por kryeministri i vendit nuk do t’ia dijë.
Edi Rama e ka braktisur detyrën, për të hapur në Berlin një ekspozite të re për shitjen e krijimeve të tij, në shkelje të hapur të ligjeve dhe të Kushtetutës së vendit, e cila detyron heqjen e mandatit për deputetin Edi Rama”, deklaroi Vokshi.

E për këtë sipas saj, shpjegimi për këtë është fare i thjeshtë. “Deri në vitin 2014, Edi Rama ka deklaruar zero lekë nga krijimtaria artistike. Pasi bëhet Kryeministër, Edi Rama, nis të hapë ekspozita në Europë dhe në Shtetet e Bashkuara. Për 3 vjet rresht, në 2015-2016-2017, ka deklaruar 79 milionë lekë të ardhura nga krijimtaria artistike. Gjithçka është në kundërshtim me ligjin dhe detyrën e tij si kryeministër dhe si deputet”, tha deputetja e PD.

Ajo shpjegoi se ligji për parandalimin e konfliktit të interesit në ushtrimin e funksioneve publike, përcakton në nenin 27 të tij se, “Kryeministri nuk mund të ushtrojë veprimtari private që krijon të ardhura në formën e personit fizik tregtar”.

“Duke shitur krijimtarinë e tij artistike dhe duke krijuar të ardhura të deklaruara 79 milionë, kryeministri Edi Rama ka vepruar në cilësinë e personit fizik tregtar, siç e përcakton ligji për të drejtat e autorit. Kjo përbën qartazi papajtueshmëri me funksionin e Kryeministrit dhe deputetit, duke shkelur hapur Kushtetutën. Në këto kushte, Kuvendit të Shqipërisë i takon të mos sillet si vegël në duart e Edi Ramës, por të ushtrojë të drejtën e vet: të konstatojë papajtueshmërinë me funksionin e Kryeministrit/deputetit dhe të deklarojë mbarimin e mandatit të Edi Ramës në bazë të nenit 71 të Kushtetutës”, tha Vokshi.

Sipas saj, paligjshmëria, abuzimi me pushtetin dhe pasurimi i babëzitur janë 3 tiparet kryesore të Edi Ramës në krye të qeverisjes së vendit.
“Ai e tregoi këtë edhe pak kohë më parë, kur ne provuam me dokumente zyrtarë se Edi Rama nuk i justifikon 400 milionë lekët e deklaruar për vilën superluksoze të Surrelit. Edi Rama heshti, sepse e di që fshehja e pasurisë dhe pastrimi i parave janë vepra penale që dënohen me burgim te gjatë! Heshtja e tij dhe e institucioneve që kontrollon, mund ta ndihmojë edhe tani për të shpëtuar mandatin nga ushtrimi i paligjshëm i detyrës së kryeministrit, por nuk do ta shpëtojë dot përgjithmonë!”, u shpreh deputetja demokrate.

Vokshi theksoi se ‘ka ardhur koha t’i japim fund këtij modeli të neveritshëm dhe shkatërrues për shoqërinë tonë’. “Është koha të bashkohemi në protestë për të mos e lejuar më kryeministrin të shkëmbejë me ekspozita pikture, të ardhmen e fëmijëve tanë!”, deklaroi ajo.