Këshilli Kombëtar i PD-së ka votuar sot unanimisht për djegien e mandateve të deputetëve të Partisë Demokratike. 

Burime bënë të ditur se gjatë mbledhjes së sotme të zhvilluar në selinë blu, asnjë nga të pranishmit nuk është shprehur kundër propozimit të Kryetarit të PD-së, Lulzim Basha për të bërë nul mandatet e ligjvënësve të saj.

Ndërkohë që pritej vendimi për konfirmimin e djegies së mandateve, atmosfera përpara selisë blu ka qenë shumë e ndezur. Aty ishim mbledhur dhjetëra simpatizantë të kësaj force politike, të cilët brohorisnin pro Bashës dhe këtij vendimi. Me një entuziazëm të madh ata kanë pritur edhe ish-kreun e PD-së, Sali Berisha.

Kreu i PD-së Basha bëri propozimin e tij për djegien e mandateve që të dielën e kaluar, propozim i cili u ndoq më pas nga një sërë takimesh si brenda forumit të kësaj parie edhe me aleatët, ndërsa sot ky vendim u zyrtarizua.