Në 1 prill 2009, Shqipëria u anëtarësua në Organizatën e Traktatit të Atlantikut të Veriut NATO, pas përfundimit të ratifikimit të Protokollit të Anëtarësimit nga të gjitha vendet aleate dhe depozitimit të instrumentit të aderimit në NATO në Departamentin e Shtetit që është edhe mbajtësi ligjor i Traktatit të Uashingtonit.

Duke u bërë palë e këtij Traktati dhe shtet anëtar i NATO-s, Shqipëria përmbushi një synim strategjik dhe një objektiv parësor të politikës së Jashtme, duke avancuar ndjeshëm në realizimin e interesave të saj kombëtare.

Vendi ynë, që dikur ishte pjesë e Traktatit të Varshavës në vitet 1955-1968, armike e NATO-s, 10 vite më parë do ti bashkohej anëtarëve të tjerë të Aleancës më të madhe politiko-ushtarake në botë.

Në samitin e 7 prillit 2009, kur Shqipëria do të ulej për herë të parë përkrah vendeve anëtare dhe ku merrte pjesë edhe presidenti amerikan George W. Bush, ish kryeministri Sali Berisha do të niste fjalimin e tij me fjalinë që mbeti në histori “This is a miracle of Freedom” (Kjo është mrekullia e lirisë), fjalim që do të duartrokitej fort edhe nga kreu i Shtëpisë së Bardhë.

Si Kryetar i Këshillit të NATO-s, Presidenti Bush shprehu kënaqësinë për ftesën që aleanca u bëri Shqipërisë dhe Kroacisë, si dhe keqardhjen që këtë herë Maqedonia mbeti jashtë. Ai shtoi se Shqipëria dhe Kroacia kanë kontribuar me forca në misionet e NATO-s dhe kanë ndërmarrë reforma sfiduese politike, ekonomike dhe ushtarake.

Rreth një vit më parë, presidenti Bush do të vizitonte Shqipërinë, presidenti i parë amerikan në histori që viziton vendin tonë, i cili do ti hapte rrugën anëtarësimit në NATO.

Bush dhe Berisha gjatë Samitit të NATO-s, prill 2009: