Ish-ministrja e Integrimit, Klajda Gjosha e ftuar në studion e lajmeve të RTV Ora tha se pavarësisht marrjes së rekomandimit, qershorin e shikon shumë të vështirë, për të mos thënë e pamundur.

Klajda Gjosha: Unë kam kohë që e kam deklaruar që qershori do të jetë i vështirë, jo vetëm i vështirë, por ndoshta i pamundur. Nuk është se kemi të bëjmë me vetëm 4 vende skeptike, por me 4 vende që kanë filluar të deklarojnë pozicionin e tyre kundrejt çeljes apo jo të negociatave me Shqipërinë. Këto 4 vende kanë filluar të pozicionohen qartë duke thënë se Shqipërisë nuk mund t'i çelen negociatat në qershor dhe kjo është e dhimbshme. Holanda, Franca, Danimarka dhe Belgjika, janë shprehur kundër negociatave të Shqipërisë.

Gjosha u shpreh kundër ndarjes së Shqipërisë dhe Maqedonisë në këtë proces. Nëse kjo do të ndodhë tha ish-ministrja, do të ishte një katastrofë për vendin tonë.

Klajda Gjosha: Ajo çka unë mendoj në gjithë këtë është që Shqipëria mos të ndahet nga Maqedonia e Veriut. Sikur të na ndajnë do të ishte katastrofë për vendin tonë sepse do të thotë që Shqipëria do të grupohet me Kosovën dhe Bosnjën dhe do ta bënte shumë të vështirë debatin tonë të zgjerimit, por edhe mundësinë e çeljes së negociatave në të ardhmen. Pra nëse do të bëhemi pjesë e këtij grupimi kjo do të ishte fundi i një procesi që është historik, dhe është vital për vendin tonë. Uroj që kjo mos të ndodhë.

Sipas Gjoshës, institucionet shqiptare kanë harruar të bashkëpunojnë me institucionet e Bashkimit Evropian.

Klajda Gjosha:Sado politik të jetë procesi, sado në një problematikë të thellë të jetë vetë BE, me zgjedhjet e PE, me zgjedhjet e institucioneve, formimin e koalicioneve, Shqipëria dhe institucionet shqiptare kanë harruar të bashkëpunojnë me institucionet e BE dhe vendeve anëtare. Nuk mundet ne kurrsesi të arrinim në pikën ku do të diskutohej nëse Shqipëria do të vazhdojë në hapësirën shengen apo jo. Nuk është se ishte një debat politik apo racist, por ishte një debat teknik që vinte nga policia dhe prokuroria e Holandës, që kishte të bënte me një mungesë të komunikimit të institucioneve shqiptare.