Presidenti i Republikës, Ilir Meta i bën apel klasës politike që të reflektojë urgjentisht për të mos humbur këtë moment historik për gjithë vendin.

Gjatë një interviste për DW, Meta thotë se edhe ditën kur opozita vendosi të digjte mandate ishte po në Gjermani dhe pavarësisht apelit për të dyja palët, zëri i Presidentit nuk u dëgjua.

“Por sidoqoftë-thotë Meta-asnjëherë nuk është vonë. Unë në mënyrë të vazhdueshme kam nxitur vendosjen e dialogut, por për fat të keq të dy palët kanë vendosur disa kushte që e kanë bërë të pamundur një tryezë apo një takim zyrtar”.

Pavarësisht kushtit të opozitës për të mos u ulur në tryezën e dialogut me Edi Ramën kryeministër, Meta thotë se “përpjekjet e mia do të jenë të palodhura, por edhe çdo kontribut i partnerëve tanë për rivendosjen e këtij dialogu është edhe i domosdoshëm”.