Me sinjalizimin e DEA-s amerikane, autoritetet greke zbuluan në Portin e Pireut një sasi prej 137 kilogramë kokainë, që vinte nga Ekuadori me destinacion final Shqipërinë. Droga ishte fshehur në motorët e frigoriferëve në katër kontenierë me banane, të porositura nga një kompani shqiptare, e cila operon në treg nga viti 2011.

Kur ngarkesa mbërriti në Durrës, skuadra operacionale i mbajti nën vëzhgim kontenierët. Përgjatë katër ditëve fotografuan dhe filmuan lëvizjen e disa personave të dyshuar si pritësit e drogës.

Prokuroria zbuloi se personi kyç në linjën e trafikut ishte Gentian Malindi, pronari i një anije peshkimi, i skeduar më herët për trafik hashashi. Bashkëpunëtorë të tij ishin oficeri i sigurisë në port, Ardian Bega dhe Altin Mislihaka.

Pas shumë përpjekjesh, me ndihmën e Begës, i cili kishte mundësi të depërtonte në Port, ata mundën të hapnin njërin nga kontenierët dhe të merrnin 22 pako të mbështjella me natriban dhe nisën udhëtimin në drejtim të Kavajës.

Në një tunel në afërsi të shkëmbit të Kavajës, trafikantët hapën pakot për të verifikuar nëse ngarkesa ishte në rregull. Aty mbetën të shokuar, pasi kuptuan se kishin rënë në kurthin e policinë. Në pako kishte vetëm oriz.

Gentian Malindi, pronar i anijes ‘Anyway’, është shpallur në kërkim. Ndërsa dy të dyshuarit si bashkëpunëtorë u arrestuan në qytetin e Durrësit. Altin Mislihaka, rezulton nga hetimet të jetë i punësuar nga Malindi, si ndihmës i tij në peshkim dhe për mirëmbajtjen e anijes. Oficeri i sigurisë së Portit, Bega, i cili rezulton të ketë përdorur dokumentin e tij për të hyrë e dalë nga Porti, ka pranuar para hetuesve se ka njohje me Malindin dhe ishte pikërisht ai që i kërkoi të hapte kontenierët për të nxjerrë prej andej një ngarkesë.

Në këmbim, ai thotë se i premtoi para. Por, mohon të ketë lidhje me trafikimin e drogës. pavarësisht pretendimeve të tyre, Gjykata për Krime të Rënda caktoi masën e sigurisë “arrest me burg” ndaj Begës dhe Mislihakës.