Edi Rama duke përdorur si gjithmonë, levën `juridike` Ulsi Manja dhe me mbështetjen e disa anëtarëve që ka emëruar vetë në Këshillin e Lartë të Prokurorisë, po tenton që të kapë SPAK (Struktura e Posaçme Antikorrupsion) me të njëjtën skemë siç uzurpoi prokurorinë e Përgjithshme, me anë të Arta Markut.

Por plani ka dështuar (tani për tani) ditën e sotme gjatë mbledhjes së KLP, pas ndërhyrjes së anëtarit Besnik Cani. Kjo mbledhje e Këshillit të Lartë të Prokurorisë kishte si objekt krijimin e SPAK, edhe pse ende nuk është plotësuar numri i nevojshëm i prokurorëve që do të jenë pjesë e tij, sipas Kushtetutës së re të vitit 2016, miratuar me 140 vota në parlament.

Sipas një propozimi të kreut të Komisionit të Ligjeve, Ulsi Manja, kërkohet që kjo strukturë e rëndësishme të nisë punën me vetëm 8 prokurorët të cilët kanë kaluar aktualisht vettingun, ndërkohë që Kushtetuta e thotë qartë se SPAK nuk mund të ngrihet nëse nuk ka të paktën 10 anëtarë të verifikuar. Puçi që po tentohet për kapjen e SPAK po përdor të njëjtën skemë identike, si ajo me zgjedhjen e Arta Markut.

Kërkohet që numri 10 i anëtarëve që kërkon minimalisht Kushtetuta të plotësohet me 2 prokurorë të `përkohshëm`, ose të `komanduar`.

Duket qartë plani dhe tentativa e Edi Ramës për të shndërruar, edhe SPAK njësoj si prokurorinë e Arta Markut, e cila u inflirtua edhe ajo si e `komanduar` dhe `e përkohshme` por vazhdon ende pas 3 vitesh që të kontrollojë në shërbim të atyre që e votuan, organin e akuzës.

Por pas një debati të ashpër, mbledhja e KPL për të marrë një vendim përfundimtarë mbi këtë propozim të Ulsi Manjës u shty për një datë tjetër pas kërkesës së anëtarit Besnik Cani.

Arsyeja formale që paraqiti ai ishte fakti, se nuk ishte njohur me projekt-aktet të paraqitura në rendin e ditës në kohën e përcaktuar në ligj, 7 ditë para njoftimit te datës së mbledhjes plenare. Besnik Canit deklaroi se i kanë mbërritur materialet ditën e premte pasdite, jashtë orarit zyrtar.

Ndërkohë kryetari Komisionit të Ligjeve, Ulsi Manja i ka kërkuar kreut të KLP, Gent Ibrahimit, që të shfrytëzojë kuadrin ligjor, pasi sipas tij, SPAK mund të ngrihet me 10 prokurorë, 8 që kanë kaluar vetting-un dhe 2 të jenë të përkohshëm ose të komanduar. Por nga burime brenda mbledhjes, mësohet se anëtarët e KLP-së kanë qenë të ndarë tek kjo pjesë. Disa prej tyre ishin pro planit të Manjë për të ngritur SPAK me këtë formulë, kurse të tjerë absolutisht kundër duke e quajtur këtë tentativë, krejtësisht anti-kushtetuese.

Aktualisht 15 prokurorë janë kualifikuar për t’u bërë pjesë e SPAK, por nga këta kanë kaluar vetting-un vetëm 8 prej tyre. Vendimet e Komisionit të Pavarur të Kualifikimit për dy prokurorë të tjerë janë ankimuar në Kolegjin e Posaçëm të Apelimit, ndërsa pesë prokurorë nuk i janë nënshtruar ende procesit të vetting-ut.

Pikërisht në këtë situatë Manja njësoj si atëherë kur zgjodhën Arta Markun, fshehurazi ka përgatitur pasditen e të premtes në emër të Komisionit të Ligjeve një projekt-akt, të cilin Ibrahimi me po të njëjtën shpejtësi e futi ditën e sotme në rend të ditës.

Nuk dihet se si do të shkojë mbledhja e ardhshme për këtë çështje madhore, por duket qartë se Edi Rama e ka një plan për të kapur organin e drejtësisë te i cili i kanë sytë dhe shpresat të gjithë shqiptarët; SPAK.