Sekretari i Përgjithshëm i PD, Gazment Bardhi, reagoi pas rezolutës së Unionit Ndërkombëtar Demokrat. Sipas tij, kjo rezolutë tregon se sa urgjente është nevoja që Shqipëria të zgjidhë krizën. Bardhi tha se kjo krizë zgjidhet përmes zgjedhjeve të parakohshme parlamentare dhe lokale.
“Rezoluta e Unionit Ndërkombëtar Demokrat (IDU) është një tjetër dëshmi e nevojës urgjente që ka Shqipëria për të zgjidhur krizën e rëndë politike në vend, nëpërmjet zgjedhjeve të lira e të ndershme, të parakohshme, parlamentare dhe lokale në një ditë. Përparimi i Shqipërisë në rrugën e saj europiane kalon vetëm nëpëmjet një Qeverie të dalë nga vullneti i qytetarëve dhe që punon për interesin e qytetarëve.
Është fakt që betejat e Partisë Demokratike dhe Opozitës së Bashkuar, për Reformë gjithëpërfshirëse Zgjedhore; për zgjedhje të lira e të ndershme; për luftë kundër fenomenit të blerjes së votës dhe përfshirjës së krimit të organizuar në zgjedhje; për zbatimin e Ligjit të Dekriminalizimit; për funskionimin e gjykatave, përfshirë Gjykatës Kushtetuese; dhe për luftën kundër narkotikëve dhe krimit të organizuar, gjejnë pasqyrim tashmë në të gjitha dokumentet e partnerëve tanë ndërkombëtar. Mund të jetë nga rastet e rralla, që kemi një opozitë që nuk po lufton thjesht të vijë në pushtet, por po lufton çdo ditë për të arritur standarde europiane, dhe për ta transformuar totalisht vendin nesër,” thotë Bardhi.
Rezolutë e Unionit Ndërkombëtar Demokrat (IDU)
Miratuar në Takimin Ekzekutiv
6 Dhjetor 2019, Washington DC
• Duke mbajtur në konsideratë konkluzionet për Shqipërinë të Këshillit Evropian mbajtur në 17-18 Tetor 2019 dhe Raportin e OSBE/ODIHR në 5 Shtator 2019;
• Duke mbajtur në konsideratë faktin që Shqipëria është duke u përballur me një krizë të thellë politike, me largimin e popullsisë nga vendi dhe me rënien e ekonomisë;
• Duke mbajtur në konsideratë faktin se zgjedhjet e 30 Qershorit u mbajtën pa marrë parasysh interesat e zgjedhësve dhe u zhvilluan në sfondin e një situate krize politike dhe institucionale;
• Duke njohur angazhimin e vendosur dhe të palëkundur të Partisë Demokratike të Shqipërisë në mbështetje të procesit të Integrimit Europian të Shqipërisë;
• Në mbështetje të angazhimit të Bashkimit Europian për procesin e zgjerimit, bazuar në përmbushjen e kritereve të anëtarësimit nga vendet aplikante;
• Duke theksuar rëndësinë e procesit të integrimit si një katalizator i reformave, dhe duke vlerësuar mbështetjen që gëzon ky proces nga qytetarët shqiptarë;
Unioni Ndërkombëtar Demokrat:
1. I bën thirrje partisë qeverisëse dhe opozitës në Shqipëri të ndërmarrin çdo përpjekje për ta tejkaluar në mënyrë të menjëhershme këtë krizë të thellë politike nëpërmjet dialogut politik.
2. Shpreh keqardhje për mungesën e vullnetit politik nga partia qeverisëse për të arritur progres në draftimin dhe miratimin me konsensus nga partitë politike të reformës zgjedhore në përputhje me rekomandimet e OSBE/ODIHR.
3. Duke theksuar thirrjen e përsëritur nga OSBE/ODIHR të rëndësisë që ka vullneti politik për të zbatuar plotësisht standartet e kërkuara për zhvillimin e zgjedhjeve të lira e të ndershme, bën thirrje për zbatimin e reformës zgjedhore në dobi të demokracisë shqiptare dhe të funksionimit të institucioneve demokratike në nivel qendror dhe vendor.
4. Shpreh nevojën urgjente që Shqipëria të sigurojë funksionimin e Gjykatës Kushtetuese dhe Gjykatës së Lartë dhe strukturat e specializuara në luftën kundër korrupsionit dhe krimit të organizuar; bën thirrje për një vendim përfundimtar të shpejtë të Gjykatës Kushtetuese mbi ligjshmërinë e zgjedhjeve të 30 Qershorit të vitit 2019.
5. Thekson se aktiviteti i blerjes së votës dhe përfshirja e krimit të organizuar në zgjedhje është e papranueshme për standartet Europiane dhe bën thirrje për rezultate të prekshme në kohë të afërt dhe procedim penal të suksesshëm të të gjithë fajtorëve përfshirë politikanët, zyrtarët dhe bandat kriminale të përfshirë në vjedhje votash dhe krime të tjera elektorale gjatë zgjedhjeve.
6. Shpreh shqetësim të thellë përsa i përket fenomenit të përsëritur të kandidimit të njerëzve me rekorde kriminale apo zgjedhjes së tyre në funksione publike në shkelje të hapur të ‘Ligjit të Dekriminalizimit’ dhe bën thirrje për zbatim të shpejtë dhe pa mëdyshje të ligjit dhe largimin nga funksioni të gjithë shkelësve të tij.
7. Vëren më shqetësim faktin se Shqipëria konsiderohet bazë operacionale e rrjeteve të krimit të organizuar si dhe po përballet me korrupsionin në të gjitha nivelet e qeverisjes; shpreh nevojën urgjente të Shqipërisë të përfundojë hetimet, procedimin dhe dënimin për rastet e korrupsionit dhe krimit të organizuar; thekson nevojën për rezultate solide në luftën kundër kultivimit masiv dhe trafikimit të kanabisit dhe luftën kundër trafikut të drogës dhe pastrimit të parave; nisjen dhe përfundimin e procedimeve të gjithë fajtorëve përfshirë politikanët dhe zyrtarët e lartë.
8. Mbështet plotësisht Partinë Demokratike të Shqipërisë dhe aleatët e saj në përpjekjet e tyre për të zgjidhur krizën politike, si dhe angazhimin e tyre të palëkundur në përmbushje të aspiratave Euro-Atlantike të qytetarëve të Shqipërisë.
