Presidenti Ilir Meta deklaroi se paralajmërimet e tij për tërmetet treguan se duhen dëgjuar ekspertët. I ftuar në Syri televizion, Meta tha se se ai nuk është gjitholog, por informacionet që i ishin dhënë nga ekspertët duhet të ishin dëgjuar.

“Ka pasur paralajmërime nga qendrat sizmiologjike të rajonit, që më kanë detyruar të bëj një ftesë paralajmëruese për të tërhequr vëmendjen për marrjen e masave. Kam mbaruar për ekonomi dhe një nga degët kryesore të ekonomisë janë statistika dhe probabiliteti. Dhe kur i njeh ato, të ndihmojnë për të kërkuar zgjidhje për parandalimin e situatave. Unë duhet t’u drejtohesha institucioneve shtetërore për të marrë masa. Kjo tregoi që duhet t’i dëgjojmë shkencëtarët. E rëndësishme për shtetin dhe institucionet është që në çdo moment duhet të jenë të gatshëm për të minimizuar pasojat e fatkeqësive. Nuk është e vetmja shkresa, ka qëndrime të vazhdueshme të presidentit për të parandaluar dhe për të marrë masat për fatkeqësi të kësaj natyre apo të natyrave të tjera”, tha Meta.