Kryetarja e LSI, Monika Kryemadhi ka akuzuar Edi Ramën si një njeriun që po dëmton interesat e shqiptarëve në rajon dhe shtetin e Kosovës. Në fjalën e mbajtur në Konventën e LSI-së së Tiranës, Kryemadhi u shpreh se gjatë viteve të fundit, Kosova është sulmuar ekonomikisht dhe diplomatikisht nga ana e Serbisë duke bërë që një pjesë e shteteve të heqin njohjen e pavarësisë së saj.

Kryemadhi u shpreh se kjo politike agresive e Serbisë ka pasur bashkëpunëtor dhe vasal të Beogradi, kryeministrin Edi Rama. “Sjellja e tij ndaj Kosovës, është qartësisht antishqiptare: nuk mund të quhet ndryshe një politikë paternaliste ndaj Kosovës kur ky shtet i ri po forcon reputacionin e tij ndërkombëtar nuk mund te quhet ndryshe promovimi i shkëmbimit të territoreve midis Kosovës dhe Serbisë, që copëton jo vetëm Kosovën, por i vë zjarrin gjithë rajonit apo fishekzjarret e tij demagogjike për Shqipërinë e Madhe, kur Kosova është në kulmin e përpjekjeve të saj për anëtarësim në organizata rajonale e ndërkombëtare si dhe për njohje të reja; nuk mund të quhet veçse antishqiptare një politikë presioni ndaj Kosovës për çështje të rëndësishme të marrëdhënies së saj me Serbinë, si ajo e taksës; nuk mund të quhet ndryshe angazhimi në nisma rajonale, jo-transparente, pa qëllime e objektiva të qarta, si e ashtuquajtura Mini-shengen, duke përjashtuar dhe tradhetuar Kosovën jashtë, e duke fyer publikisht udhëheqësit e zgjedhur të Kosovës”,- tha kryetarja e LSI.

Kryemadhi u shpreh se fatkeqësisht gjithë revanshi i Serbisë ndaj Kosovës po ndodhë në kohën kur Shqipëria drejtohet nga Edi Rama, i cili është dhe ministër i Jashtëm. “Po ndodh në kohën e Edi Ramës, që është zyrtarisht edhe ministër i jashtë i Shqipërisë, që disa vende po tërheqin njohjet për Kosovën. Ndërkohë, që miku më i ngushtë në rajon i tij është Aleksandër Vuçiç, që është arkitekt i revanshit kundër Kosovës”,- deklaroi kryetarja e LSI.