Kryeministri Edi Rama për herë të parë ka pranuar ekzistencën e krimit të organizuar në politikë dhe administratën shtetërore, por sipas tij ajo kohë tashmë mund të quhet e kaluar.

Këtë qëndrim e mban menjëherë pas takimit me kancelaren Angela Merkel, ndërkohë që lista e gjatë e eksponentëve të krimit të futur në politikë si deputetë dhe kryetar bashkish (pa llogaritur administratën shtetërore) nga ana e Rilindjes vazhdon që të pasurohet me emra të rinj.

Duke folur sot për krimin në politikë gjatë punimeve të “Forumit Ekonomik të Tiranës”, Rama deklaroi se ka marrë fund koha kur krimi i organizuar bëhej pjesë e administratës dhe politikës, por “harron” të japë një shpjegim për denoncimet e forta të opozitës dhe të medias, të cilat me fakte dhe dokumente po nxjerrin zbuluar një numër të madh kryebashkiakësh dhe punonjës të niveleve të ndryshme të administratës publike, me të shkuar kriminale.

“Biznesit të paligjshëm do i themi që ky nuk është vendi i tyre dhe duhet të kalojnë shumë vështirësi, ka ardhur koha t’i shkojmë pas atyre seriozisht e të bëjmë të mundur që të gjithë këto gjera negative që kanë bërë me krimin e organizuar duke hyrë në administratë e politikë, kjo kohë ka marrë fund”, tha Rama.

Ndërkohë që sipas Ramës, nuk ka më eksponentë të krimit të organizuar në politikë dhe në administratë, opozita ka paralajmëruar se janë të paktën edhe 10 kryebashkiakë të tjerë të Rilindjes, të cilët po verifikohen prej saj, për penalitete dhe lidhje kriminale në të shkuarën.