Reporterja e Parlamentit Europian për Kosovën, Viola von Cramon, reagoi pas një deklarate nga Departamenti i Shtetit, ku thuhet se nuk ka asnjë plan sekret për shkëmbim territoresh mes Kosovës dhe Serbisë.
Cramon thotë se shpreson që SHBA të mbajë fjalën.
“Ne vetëm mund të shpresojmë se SHBA, pas krijimit të rrëmujës në shtetin e Kosovës, do t’i mbetet besnike fjalës se nuk ka plan sekret dhe nuk ka shkëmbim territoresh”, shkruan eurodeputetja.
Shtetet e Bashkuara theksuan të enjten se nuk ka asnjë plan të fshehtë për shkëmbim territoresh ndërmjet Kosovës dhe Serbisë dhe se bisedimet ndërmjet të dyja vendeve duhet të çojnë në njohje të ndërsjellë.
Këto komente u bënë në një deklaratë të përbashkët të ambasadorit Richard Grenell i dërguar i posaçëm i presidentit Donald Trump për bisedimet e paqes Kosovës – Serbi, ambasadori amerikanë në Kosovë, Philip Kosnett dhe përfaqësuesit të posaçëm për Ballkanin Perëndimor, Matthew Palmer.
