Këtë pasdite ”Foltorja” nga Sali Berisha është ndalur në Elbasan, aty ku demokratët i kanë bërë një pritje madhështore liderit historik të PD-së. Në fillim të fjalimit, Berisha tha se regjimi i kryeministrit Edi Rama ka katandisur shqiptarët në varfëri dhe Shqipërinë në ”delen e zezë” në Europë. Kurse për opozitën tha se është e paaftë, pasi Rama po kalon nga mandati në mandat.
Ish-kryeministri në fjalën e tij tha se gjatë qeverisjes së tij Shqipëria ishte asokohe vendi me te ardhura të mesme të larta dhe kjo ishte një rritje historike, ndërsa sot shqiptarët kanë rrogat me të ulëta në rajon.
”Duhet të ngrihemi të bashkohemi, të hapemi, në mënyrë që ti japim përgjigjen më të merituar kësaj situate të krijuar nga vendosja në Shqipëri i një regjimi i cili ka vetëm një emër bandito-kraci. Edi Rama dhe regjimi i tij ka katandisur Shqipërinë dhe shqiptarët në delen e zezë të Ballkanit dhe Evropës. Nga një tokë e bekuar, në një vend të pashpresë nga i cili të rinjtë ikin dhe vetëm ikin”.