Kryetari aktual i PD, Lulzim Basha ka bërë një deklaratë të fortë në mbledhjen me kryetarët e degëve sot në selinë blu.

Basha është shprehur se në 11 dhjetor do të ketë miting nga Sali Bërisha dhe jo mbledhje të Kuvendit Kombëtar.

Ai ka paralajmëruar se kushdo që merr pjesë në Kuvendin e datës 11 do të përballet me sanksionet e statutit, duke kërcënuar kështu me përjashtim nga PD edhe të liderit historik Sali Berisha.

“Do të bëjë Sali Berisha miting me 11 dhjetor? Apo mendon se do të ngrejë struktura paralele? Ka thënë që nuk e njeh Kuvendin e datës 18 si Kuvend legjitim. E kuptoj, asgjë legjitime nuk njeh Sali Berisha. Sepse qëllimi është ilegaliteti, bunkerizimi, destabilizimi i PD. Por veprimet ilegjitime, tentativa për bunkerizim, dëmtimi i interesave elektorale dhe politike të PD, e kanë përgjigjen në statut. Dhe do ta zbatoj statutin ndaj kujtdo. Kush shkel vendimin e Kryesisë së partisë, fatin e ka të caktuar nga statuti i partisë, përfshirë këtu edhe Sali Berishën. Boll është boll. Asnjë anëtar nuk është mbi statutin dhe nuk është mbi të tjerët”- u shpreh Basha