Deputeti Tritan Shehu, në një intervistë me Skype me moderatoren Armela Ferko në Syri Tv, foli për takimin e Lulzim Bashës me ambasadorët.
Shehu theksoi se takimi është kërkuar nga ai që ka takuar ambasadorët, duke shtuar se gjithçka i duket veprim normal politik.
'Takimi me ambasadorët është rutinë në politikë. Në fund të takimit nuk u dha asnjë prononcim nga ambasadorët. Kështu ambasadorët konfirmojnë se thjesht kanë bërë një takim, e janë larguar e kaq. Nuk shoh asgjë të jashtëzakonshme dhe të çuditshme e që të jetë në vëmendje të opinionit publik shqiptar.
Ambasadorët thjesht e kanë takuar Bashën dhe kanë ikur, e kaq mbetet kjo histori, e në opinionin tonë zgjatet pa kuptim, duke zgjuar komplekse inferioriteti.
Takimi nuk është kërkuar nga ambasadorët. Ky takim është kërkuar nga ata që kanë takuar ambasadorët dhe kaq është. Ambasadorët kur kanë diçka për të thënë e shpjegojnë vetë, nuk kanë nevojë që të shkojnë nga një zyrë në tjetrën', deklaroi Shehu