Pas mbarimit të takimit në Fier, Lulzim Basha postoi një foto online, ku dukej se më krenar ishte për faktin se në krahun e tij ishte Agron Kapllanaj, i dënuar në Itali për vjedhje.
Në mënyrë paradoksale, Basha shkruante se ndjehej i çliruar nga hijet e së shkuarës. Po shohim nga e ardhmja, përsëriti Lulzim Basha me Kapllanaj në krahun e djathtë.
Por cila është e ardhmja për të cilën po flet Lulzim Basha? Për Agron Kapllanajn e dënuar në Itali, që ia rrëzon të gjithë retorikën e vetingut në politikë? Apo për vëllain e Agron Kapllanajt, i cili vazhdon të majmet familjarisht me tendera, ndërkohë që demokratët kanë 12 vite në opozitë?
Vëllai i Kapllanajt merr miliona nga tenderat që i jep Edi Rama në Fier dhe në Vlorë, ndërkohë që bashkë me socialistët ndihmojnë Bashën për të mbushur sallën me militantë socialistë
Por salla e Fierit nuk ishte e mbushur vetëm me socialistët e dërguar me urgjencë nga Edi Rama dhe njerëzit e tij në zonën e Fierit.
Në krah të Lulzim Bashës ishte edhe kreu i PD-së në Patos, Shezai Sinanaj, një ish-polic i arrestuar në vitin 2015 pasi u kap me një ngarkesë droge bashkë me të vëllanë.
Shfaqja e sotme në Fier me krim, drogë, vjedhje dhe tendera nuk është asgjë në krahasim me atë që ndodhi më 8 janar.
Të gjithë e kujtojmë se si selia u mbrojt me dhunë nga mercenarët kriminelë të Lulzim Bashës dhe nga policët e Edi Ramës. Një foto u bë virale menjëherë pas dhunës barbare. Aty shihej policia me një sfond gazi nga pas. Më tej lexohej: Shohim nga e ardhmja.
Për shumë komentues dhe gazetarë, e ardhmja që ofron Lulzim Basha nuk është vetëm dhuna dhe gazi lotsjellës, por edhe krimi dhe droga, vjedhjet dhe korrupsioni.
Burimet thonë se jo vetëm selia e PD ishte e mbushur me kriminelë, emrat e të cilëve janë denoncuar publikisht, por Basha është takuar edhe me persona me rekorde kriminale. Komisioni i Rithemelimit po përgatit denoncimin dhe publikimin e këtyre fakteve tronditëse.
“Siç është PD sot, ashtu do të jetë Shqipëria nesër,” ironizonin analistët dhe komentuesit online, bazuar te shprehja e Lulzim Bashës, një përshtatje banale e deklaratave të Ramiz Alisë se ashtu siç është rinia sot, do jetë Shqipëria nesër.
Shqipëria e Lulzim Bashës sot, pa pritur të nesërmen është me një mijë të zeza. Por mbi të gjitha është si Shqipëria e Ramiz Alisë: pa pluralizëm