Ish-kryeministri Sali Berisha kritikon sërish ambasadoren e SHBA në Tiranë, Yuri Kim.

Nga Patosi ku mori pjesë në festimet e demokratëve për 31-vjetorin e themelimit të PD, Berisha tha se Kim herë shfaqet si sekretare ideologjike e PS dhe herë si zëdhënëse e Lulzim Bashës.

"Në një intervistë para 10 ditësh, zonja Kim, e cila siç e shihni kalon nga sekretare ideologjike e PS, në zëdhënëse të Lul Bravës, sipas klimës, po mburrej me investimet amerikane gjatë kohës së saj. Dua t'i them, ne këtu jemi pro amerikanë më shumë se gjithë të tjerët", u shpreh Berisha.

Ish-kryeministri solli në vëmendje fluksin e investimeve amerikane gjatë qeverisjes së tij, duke nisur nga Bechtel Enka e cila ndërtoi Rrugën e Kombit.

"Ne mirëpresim me krenari dhe kënaqësi të madhe investitorët amerikanë. Por, dua të theksoj, kompania më e fuqishme amerikane që ka punuar në Shqipëri ishte Bechtel. Ajo ndërtoi një nga projektet më kryesore të PD dhe qeverisë së saj. Bechtel fitoi Rrugën e Kombit me një tender ndërkombëtar të shpallur në Londër. Në të cilën morën pjesë 7 kompani gjigante europiane dhe botërore. Juria përbëhej nga personalitete të autostratave të Britanisë së Madhe, tjetri i SHBA, tjetri i Mbretërisë së Holandës. Bechtel fitoi tenderin, 6 kompanitë e tjera nuk patën asnjë ankesë. Zonjë, mos inkurajoni prokurimet direkte në këtë vend se pavarësisht nga vendi që ato vijnë për difinicion në manualet e luftës kundër korrupsionit, prokurimet direkte janë korruptive", tha Berisha.