Grigels Muçollari, anëtar i Komisionit të Rithemelimit të PD, ka denoncuar denigrimin që ka nisur fraksioni Basha ndaj kandidatëve demokratëve që do të garojnë në zgjedhjet e pjesshme vendore të 6 Marsit. Muçollari tha se ata po “mohojnë çdo demokrat që nuk i bindet biznesit partiak të Lulit” dhe bëri thirrje se “kush u ka marrë para në këmbim të kandidaturës, le t'ua kthejë."
“Primaret janë frymëmarrje për demokratizimin e partive politike, - ka theksuar Muçollari në shënimin e tij. - Jam krenar që PD është forca politike e parë në Shqipëri që i lejon anëtarësisë të zgjedhë kandidatët e saj. Listat e ish-kryetarit dhe vendimet e tij pas mesnate e zhytën PD në humbje të njëpasnjëshme.
Kundërshtitë e fraksionit Basha janë të kuptueshme. Ish-kryetarit i ka humbur monopoli i vendimmarrjes. Personat që ishin mprehur të emëroheshin prej tij kanë nisur një fushatë denigrimi ndaj kandidatëve demokratë. Mohojnë çdo demokrat që nuk i bindet biznesit partiak të Lulit. Kush u ka marrë para, në këmbim të kandidaturës, le t'ua kthejë.
Primaret eleminojnë servilizmin dhe korrupsionin në partitë politike. Tanimë vendimmarrja dhe sovraniteti i takon anëtarësisë. Kthim pas nuk ka! Urime kandidatëve fitues Ardian Muka në Durrës, Bardh Spahia në Shkodër, Elton Bano në Lushnjë, Hekuran Xhani në Rrogozhinë, Lulzim Vrana në Vorë dhe Premtim Kryemadhi në Dibër!”