Nënkryetari i Lëvizjes Socialiste për Integrim Petrit Vasili i është drejtuar me një kërkesë prokurorit të Përgjithshëm Olsian Çela ku i kërkon të hetojë veprimet e policisë gjatë protestave masive të mbajtura ditët e fundit kundër rritjes së çmimeve në vendin tonë.
Letra e Vasilit i është dërguar për dijeni edhe SHÇBA-së, Avokatit të Popullit dhe kryeministrit Edi Rama.
Vasili thotë se policia e shtetit ka shkelur ligjin dhe ka diskriminuar qytetarët gjatë protestave
“Siç është bërë publike në median vizive, elektronike, television të gjithë jemi bërë dëshmitarë këto ditët e fundit, Shqipëria është përfshirë nga një valë protestash masive ku qytetarë, bujq, fermerë, student, aktivistë të shoqërisë civile, familjarë, akademikë protestojnë kundër rritjes së çmimeve, keqqeverisjes, shpërdorimit të autoritetit public (…)
Ashtu si media e ka transmetuar të gjithë jemi bërë dëshmitarë se si punonjës të caktuar dhe drejtues të policisë së shtetit, kanë urdhëruar e vepruar me forcë dhe në mënyrë shproporcionale ndaj qytetarëve, grave, fëmijëve duke kryer trajtime fizike publikisht deri në nivelin e torturës apo duke i keqtrajtuar ato gjatë shoqërimit”, thuhet në letrën e Vasilit.