Ilir Meta shprehet se sa i takon ish-ministrit Alqi Bllako, i arrestuar tashmë, nuk ka qenë bashkëpunëtor i tij i ngushtë dhe se i sugjeron që të bashkëpunojë me drejtësinë në mënyrë që të marrë një dënim më të ulët.
Meta shton se Bllako është i ri dhe figura e tij politike mund të rehabilitohet sërish duke qenë dhe i dobishëm për vendin e duke kthyer paratë e vjedhura.
“Lidhur me Bllakon, nuk ka qenë bashkëpunëtor i afërt i imi, as ndonjë aktivist i LSI, e vërteta është që ka qenë në PD dhe ca kohë edhe në Bashkinë e Tiranës në kohën e PD, e vërtetë është që ish-ministri.
Ish-ministri Koka ka patur lidhje personale me të dhe ai e afroi në ministrinë qe ka drejtuar, nëse ka ardhur këtu ka ardhur sepse duhej të kishte një status të nëpunësit civil dhe ai e kishte, dhe këtu ka zbatuar vetëm ligjin, por sigurisht nuk mund të rrinte gjatë në Presidencë se donte kthehej tek tenderat.
Unë i sugjeroj të bashkëpunojë me drejtësinë, është i ri dhe nëse bashkëpunon në një kohë të caktuar mund të rehabilitojë personalitetit e tij politik dhe të kthejë lekët”, tha Meta.