Kryetarja e LSI, Monika Kryemadhi i është përgjigjur sërish sulmeve të Edi Ramës ndaj SPAK.
Duke publikuar dokumentet për aferën e inceneratorëve, Kryemadhi shkruan se Rama ka nisur sulmet kundër SPAK, pasi i duhet të mbrojë kryebashkiakun e Tiranës, Erion Veliaj.
Kujtojmë që Veliaj ka miratuar në kundërshtim me ligjin, ngritjen e inceneratorit të Tiranës, i cili do të përfitojë nga buxheti i shtetit 40 milionë euro.
“Ja pse kryeministri Edi Rama po ushtron presion ndaj prokurorisë speciale anti korrupsion (SPAK), e ngritur nga Reforma në Drejtësi e vitit 2016. Atij i duhet të mbrojë kryetarin e Bashkisë Tiranë Erion Veliaj nga prokuroria, për rolin e tij në aprovimin në kundërshtim me Ligjin e Vetëqeverisjes Vendore, të koncesionit 30 vjeçar të inceneratorit të Tiranës. Firma e Veliaj është provë e qartë korrupsioni, ndërsa presioni i Ramës ndaj drejtësisë është sulm i qartë kundër integritetit të saj. Rruga e Shqipërisë drejt BE kërkon drejtësi të pavarur dhe fundin e pandëshkueshmërisë të korrupsionit në nivelet e larta”, shkruan Kryemadhi