Presidenti Ilir Meta doli në një konferencë për shtyp, ku foli për aferën e Parkut të Butrintit.

Reagimi i Metës vjen një ditë pasi ai i ktheu mbrapsht Kuvendit këtë marrëveshje, duke e cilësuar si antikushtetuese. Edhe sot, Meta kërkoi që të ketë një hetim parlamentar për këtë skandal.

“Është detyrim i shtetit shqiptar ruajtja e tij. Parku i Butrintit është me vlera universale, dhe sipas konventës, përgjegjësia e ruajtjes nuk mund t’i kalojë në një organizmi si OJF, por ngelet përgjegjësi e shtetit. Shteti, nëse do të aplikojë këtë formë administrimi përmes një fondacioni, duhet të ruante pozitën dominuese vendimmarrëse dhe të drejtën e vetos në funksion të interesit publik në përputhje me konventën dhe kushtetutën. Marrëveshja për administrimin e kësaj pasurive duhet të bëhej në përputhje me Kushtetutën dhe vizionin e së ardhmes dhe jo e fragmentizuar në plane 10-vjeçare. Në asnjë mënyrë autoriteti rregullator dhe buxhetor nuk mund të deklarohen se nuk përmbushin detyrimet. Është e papranueshme logjika që për një pasuri si Butrinti me vlera kaq të larta, shteti të heqë dorë nga çdo përgjegjësi dhe autorizon një fondacion, ku nuk dikton dot rolin drejtues apo kontrollues sipas përgjegjësisë kushtetuese që i takon. Nëse qeveria shqiptare deklaron sot mos garantimin e mbrojtjes së vlerave kulturore e natyrore, kombëtare e universale si do të mundet ta garantojë atë me një fondacion me fuqi vendimmarrëse të kufizuar”.

Një tjetër e metë, sipas Metës është dhënia e titullit partner strategjik, që është kryer nga një organ që nuk ia ka dhënë këtë tagër ligji, si edhe mungesa e transparencës.

“Një tjetër e metë është edhe dhënia e titullit partner strategjik, që është kryer nga një organ që nuk ia ka dhënë këtë tagër ligji. Nuk ka kompetencë të vlerësojë strategjik. Kam vlerësuar se kjo çështje duhet të marrë kohë. Duhet të ishte marrë një komunikim i ngushtë dhe ekspertiza e UNESCO-s. Mungesa e transparencës jo me opinionin publik, por edhe nga ish-anëtarë të bordit të përzgjedhur që përmes deklaratave e kanë bërë të ditur”.

Meta tha se Kuvendi duhet që të mos votojë symbyllur, por të reflektojë mbi ato problematika, që sipas kreut të shtetit, kanë shoqëruar marrëveshjen e menaxhimit të Parkut të Butrintit.

Por, Meta thotë se nuk ka ndonjë optimizëm që mazhoranca të reagojë.

“Qëndrimet e mia kanë qenë të qarta në mbrojtje të trashëgimisë kulturore dhe kombëtare, si çështja e teatrit dhe ajo që po diskutojmë. Relacioni është shumë solid dhe i mirëargumentuar. Dëshiroj që për një çështje kaq të rëndësishme, Kuvendi të mos votojë symbyllur, por t’i hapë sytë mirë. Nuk duhet të paragjykoj vendimet e tij,” tha Meta, duke shtuar megjithatë se nuk është optimist.

“Nuk kam shprehur ndonjë optimizëm mbresëlënës për sa i takon përgjegjshmërisë së mazhorancës. Apeloj që për një çështje të rëndësisë kaq të madhe, të ketë një reflektim”.

Meta u pyet edhe në lidhje me një padi që është ngritur ndaj tij për çështje lobimi.

“Këto lajme absurde si vetë personazhet që i njihni të gjithë nuk krijojnë asnjë shpërqendrim nga detyrat e presidentit, por edhe nga angazhimet e zotit Ilir Meta duke nisur nga 25 korriku. Gazeta austriake do e marrë përgjigjen atje. Kjo është një histori që as ka ekzistuar dhe as nuk ekziston.

Ata që kërkojnë letra për azil për të shpëtuar nga drejtësia këtu, të vazhdojnë të bëjnë më të mirën e tyre. Ky është një sistem që do tundet nga themeli nga 25 korriku,” tha Meta