Një ditë pasi la detyrën e Presidentit të Republikës, Ilir Meta u rikthye në Lëvizjen Socialiste për Integrim. Ish-Presidenti la të hapur mundësinë e një tjetër force politike, me fokus vendosjen e referendumit si zgjidhje për të ndryshuar sistemin politik, ndërsa mirëpret bashkëpunimin me forcat e tjera opozitare.

Ilir Meta nuk ka humbur kohë. Një ditë pasi hoqi kostumin e Presidentit të Republikës, u rikthye në Lëvizjen Socialiste për Integrim, forcën që themeloi në vitin 2004. Por ish-Presidenti nuk do të rikthehet më në drejtimin e LSI-së.

Meta la të hapur mundësinë për krijimin e një tjetër force politike, që synon të ndryshojë sistemin partiak dhe të vendosë balancat përmes referendumit.

Ish-Presidenti i la të hapura dyert e bashkëpunimit me Kryetarin e Partisë Demokratike, Sali Berishën, tashmë që është rikthyer në opozitë.

Meta sulmoi Kryeministrin Rama dhe ish-Kryetarin e PD-së, Lulzim Bashën, duke e akuzuar se shiti opozitën, në marrëveshje me shefin e qeverisë.

Ish-kreu i shtetit vuri ne dukje edhe paradoksin e vendimit të Kryeministrit për të shkarkuar kryenegociatorin Zef Mazi sapo u çelën negociatat.

Pas takimit të nostalgjisë, Ilir Meta deklaroi se do të japë për herë të fundit, llogari para anëtarëve të LSI-së, të cilët e bënë President, ndërsa më pas do të kthejë sërish sytë nga populli i 2 marsit