Kryetari i Partisë Demokratike, Sali Berisha, në një takim me intelektualët në Tiranë, ka sfiduar sërish Shtetet e Bashkuara të Amerikës dhe Mbretërinë e Bashkuar pas shpalljes ‘non grata’. Berisha deklaroi i prerë se nëse sjellin një fakt të vetëm kundër tij, do të japë dorëheqjen nga politika.

Kreu i selisë blu u shpreh qartë se nuk ekziston asnjë provë për ato që e akuzojnë SHBA dhe Britania ndërsa shpeshherë ka artikuluar se është shpallur ‘non grata’ nga lobimi i George Soros me Edi Ramën.

“Më 20 maj të 2021, unë në një sallë në këtë hotel kam dalë, s’kisha menduar kurrë se do të sfidoja ndonjëherë sekretarin e SHBA, kurrë, por m.q.s ai kishte firmosur një akt në të cilën unë kisha bindjen absolute se nuk qëndronte asnjë fakt, dola dhe i thashë paraqit çdo fakt, përndryshe do të shkoj në gjykatë.

Do shkoj në gjykatë se nuk ke, nuk mund të gjesh dhe s’do të gjesh kurrë asnjë fakt për mua dhe as për fëmijët e mi. Unë kam qenë i këtij kodi dhe sot pas 15 muajsh më gjithë check up-in universal, se kam edhe unë miqtë e mi, kanë gjetur zero.

Megjithatë unë vazhdoj të them, një fakt të vetëm po sollët unë i them mirupafshim politikës dhe çdo vendim tjetër. Por, të pranoj një të pavërtetë për të vërtetë, kurrë. E ka thënë Galileo dhe s’mund ta bëjë njeriu i qytetëruar kurrë.”-deklaroi Sali Berisha.