|
Lidhja Demokratike e Kosovës ka deklaruar se presidenti i Shqipërisë, Bajram Begaj ka refuzuar që të zhvillojë një takim me drejtues të kësaj partie në selinë e LDK.

Sipas gazetës Express, Presidenti shqiptar ka kërkuar nga LDK të takohen në ambiente të tjera.

“Lidhja Demokratike e Kosovës shprehë keqardhje për mosrealizimin e takimit zyrtar me Presidentin e ri të Shqipërisë, shkëlqesinë e tij Bajram Begaj; me rastin e vizitës së tij të parë në Kosovë. Për dallim nga krerët institucional paraprak të Shqipërisë, Presidentët e shkuar, Kryeministrin e tanishëm, e të tjerë kryeministra paraprak, Presidenti Begaj ka refuzuar të takojë LDK-në në selinë qendrore të saj”, thuhet në përgjigje.

LDK e konsideron këtë qasje të pazakontë.

“Ndonëse nuk e kuptojmë refuzimin e tillë dhe shprehim njëkohësisht habinë për një qasje të pazakontë, konsiderojmë si mundësi të humbur takimin me Presidentin Begaj; të cilit i urojmë suksese në përfaqësimin më dinjitoz të Republikës së Shqipërisë. LDK ka selinë e vet dhe ajo mbetet e hapur për çdo zyrtar të shtetit shqiptar – siç ka qenë përherë”, thuhet më tej.

Kujtojmë se presidenti Bajram Begaj, nga dje po qëndron në Kosovë në vizitën e tij të parë jashtë vendit. Begaj ka takuar Osmanin, Kurtin e Konjufcën, ndërsa sot është takuar në ambientet e Kuvendit me drejtuesit e PDK-së dhe AAK-së