Pensionistët në Pogradec nuk janë të kënaqur me indeksimin prej 6 përqind që qeveria u bëri pensioneve, për shkak të rritjes së çmimeve. Qindra të moshuar në qytetin e Pogradecit protestuan këtë të mërkurë, duke e cilësuar vendimin e qeverisë si tallje ndaj pensionistëve. Ata kërkojnë kompensim për shkak të krizës, njësoj si në vendet e rajonit, ndërsa kanë bërë thirrje për vijim të protestave.
Qindra pensionistët në qytetin e Pogradecit u ngritën në protestë, pas vendimit të qeverisë për të indeksuar me 6 përqind pensionin e tyre. Vendimin e qeverisë për këtë indeksim, pensionistët e cilësojnë si tallje.
Të revoltuar, pensionistët akuzojnë Kryeministrin Edi Rama se për veten shpenzon shuma marramendëse nga buxheti i shtetit në udhëtimet jashtë vendit, ndërsa qytetarët i braktisë.
Pensionistët, shumë prej të cilëve ish-minatorë, kanë bërë thirrje për vazhdim të protestave derisa qeveria të dëgjojë zërin e tyre për rritjen e pensioneve.
Teksa kryeministri flet për mirëqënie dhe rritje ekonomike, pensionistët i kërkojnë llogari se pse atëherë pensionet dhe rrogat në Shqipëri nuk janë në të njëjtat standarde me ato të vendeve fqinje apo të Bashkimit Europian.
