"12 Nëntori është dita kur qytetarët do të kërkojnë llogari për vjedhjen e përditshme, të pamëshirshme që iu bëhet "

Kryetari i Partisë së Lirisë, Ilir Meta, deklaroi sot se Kryeministri Edi Rama duhet të japë menjëherë dorëheqjen, duke e akuzuar për abuzime të rënda, vjedhje të rënda me tenderat dhe kontratat koncensionare si dhe afera të tjera.

“Të gjitha këto vjedhje kanë një autor dhe një përgjegjës, që është Edi Rama, - tha Ilir Meta. - Ndaj Edi Rama duhet të japë menjëherë dorëheqjen sepse është përgjegjësi kryesor dhe shkaktari i vetëm i shpërbërjes së shtetit dhe degradimit total të qeverisjes në një bandë hajdutësh. Ndërsa Edi Rama vazhdon të qeverisë nga ajri me charterin superluksoz, shqiptarët në tokë përballen me skamjen, varfërinë dhe mjerimin, ndaj dorëheqja dhe largimi i tij i menjëhershëm është zgjidhja e vetme që shqiptarët të mos jenë më vend ii parë në botë në kërkesat për azil.

Ashtu si në vitet ’90, kur shqiptarët ishin përballë regjimit komunist, të cilin e rrëzuan me gjithë fuqinë e tyre, edhe sot janë sërish përballë një regjimi po aq të urryer, po në dallimin se ky i sotmi është regjimi i hajdutëve dhe grabitqarëve më të neveritshëm që historia e Shqipërisë ka parë me një kryehajdut si Edi Rama në krye, i cili në vend që të jepte dorëheqjen prej kohësh, kujton se do të fitojë kohë përmes sakrifikimit të bedelave të tij, ndërkohë që është e qartë që e gjithë përgjegjësia për këtë shkatërrim të shtetit, i cili nuk i del më për zot qytetarëve të tij, por është kthyer vetëm në një instrument për të sulmuar opozitën dhe për të sulmuar intelektualët, për të sulmuar dhe denigruar pedagogët dhe gjithë zërat kritikë të shoqërisë, për të sulmuar mediat kritike dhe të pavarura, ndaj 12 nëntori është dita kur qytetarët do të kërkojnë llogari për vjedhjen e përditshme, të pamëshirshme që iu bëhet si dhe për pasigurinë totale ku e ka futur vendin, familjet shqiptare dhe qytetarët e këtij vendi, banda e Rilindjes, ndaj Edi Rama duhet japë dorëheqjen e të mos vonohet asnjë sekondë më shumë, për të mos e rënduar akoma më tej veten e tij.”