Presidenti i Serbisë Aleksandar Vuçiç urdhëroi Forcat e Armatosura të Serbisë të jenë në nivelin më të lartë të gatishmërisë luftarake.
Lajmin e konfirmoi ministri i Mbrojtjes Millosh Vuçeviq.
“Presidenti i Serbisë, si komandant i përgjithshëm, ka urdhëruar sonte (26 dhjetor) që Forcat e Armatosura të Serbisë të jenë në nivelin më të lartë të gatishmërisë luftarake, gjegjësisht gatishmërisë deri në nivelin e përdorimit të forcës së armatosur, gjegjësisht potencialit të armatosur të ushtrisë serbe," tha ai, citon Tanjug.
“Nuk ka arsye për panik, por ka arsye për shqetësim, sepse duket se Serbia është e vetmja palë e interesuar për të biseduar, për marrëveshje politike, për t'u takuar qoftë edhe një mijë herë derisa të gjendet ndonjë marrëveshje.
Pala tjetër është duke bërë vazhdimisht lëvizje të njëanshme, ngritë tensione dhe vazhdimisht çon në përshkallëzim të mëtejshëm të situatës, që për mendimin tim, ka një synim të qartë për pastrim të plotë etnik të Kosovës dhe Metohisë," vijoi ai.