Kryetari i Partisë së Lirisë, Ilir Meta, ka bërë një paralajmërim sot për përkeqësimin e situatës ekonomike në vend dhe një rritje shumë të ulët ekonomike të pritshme, prej vetëm 2%, për shkak të korrupsionit galopant të qeverisë siç e cilësoi dhe të politikave të saj antisociale.
Në fjalën e tij, Meta tha: “Me rastin e çeljes së sesionit të ri parlamentar, në emër të Partisë së Lirisë, do të doja së pari të ndalesha në situatën e përkeqësuar ekonomike që pritet të ndeshemi gjatë këtij sesioni dhe viti, si rezultat i korrupsionit galopant të qeverisë rilindëse dhe njëkohësisht i politikave të saj tërësisht antisociale dhe kundër interesit publik, që tregohet mjaft qartë edhe në strukturën e dështuar të ekonomisë sonë.
Për këtë mjafton t’i referohemi edhe vlerësimeve më të fundit nga Shefja e Misionit të FMN për Shqipërinë, Jan Sun, së fundi, që paralajmëron gjithashtu si edhe institucione të tjera ndërkombëtare që rritja ekonomike pritet të ngadalësohet më tej duke zbritur deri në 2% gjatë vitit 2023 duke reflektuar kushtet më të shtrënguara financiare në vend si pasojë e inflacionit që është rritur i nxituar sidomos nga rritja e çmimeve të ushqimeve dhe të energjisë, që është bërë gjithnjë e më gjerë, pra duke prekur gjithnjë e më shumë shtresa shoqërore në vend.”