Ilir Meta, kryetari i PL-së, ka ngritur më forcë në nisje të këtij viti, rrezikun që paraqesin për gjendjen ekonomike të vendit, kontratat koncensionare PPP dhe solli në vëmendje të qeveritarëve, rekomandimet që ka dhënë FMN-ja si prioritet urgjent për të dalë nga kjo situatë.

Para medieve, Meta tha se do të nënvizonte përsëri “shqetësimin mjaft serioz të ngritur në mënyrë të përsëritur edhe nga Shefja e Misionit të FMN-së, degradimin e PPP-ve ku thuhet në mënyrë eksplicite se “ne, pra FMN, mbetemi të shqetësuar për rreziqet e PPP-ve të vlerësuara në rreth 40% të Prodhimit të Përgjithshëm Bruto të vitit 2022, bazuar në vlerat e kontratave ekzistuese dhe të atyre në proces.

Kuadri për koordinimin dhe menaxhimin e PPP-ve vazhdon të vuajë nga dobësi të mëdha dhe mbetet e paqartë sesa të zgjeruara janë rreziqet fiskale.

Paralajmërim më serioz për kërcënimin që sjellin PPP-të, të cilat kanë dalë tërësisht jashtë kontrollit nga ana e qeverisë dhe institucionet shtetërore, tregojnë shumë qartë se vendi mund të përballet me situata të cilat mund të dalin jashtë çdo parashikimi.

Ndaj, shefja e FMN thekson: “Prioritet urgjent për Shqipërinë është përafrimi i kornizave të menaxhimit të PPP-ve dhe të investimeve publike si dhe integrimi i tyre i plotë në ciklin normal të Buxhetit. Vetëm në këtë mënyrë do të kemi një situatë shumë të qartë dhe të parashikueshme financiare për vendin, për të ardhmen.”