Ilir Meta e ka përshëndetur sot, koalicionin për zgjedhjet vendore të 14 majit, ndërmjet Partisë Demokratike dhe PBDNJ, që u firmos nga kryetarët e dy partive, Sali Berisha dhe Vangjel Dule, duke e konsideruar atë si një hap i bashkimit të opozitës për fitore.
Meta, kryetari i Partisë së Lirisë, publikoi foton e marrëveshjes dhe shkroi këto radhë: “Përshëndesim marrëveshjen e sapo nënshkruar midis Partisë Demokratike dhe PBDNJ, si një hap i rëndësishëm i bashkëpunimit dhe bashkimit të opozitës për Fitoren e Ndryshimit në 14 Maj, për t’i dhënë fund monizmit në pushtetin vendor dhe rivendosur llogaridhënien dhe kontrollin e qytetarëve”.
Sipas marrëveshjes së nënshkruar sot midis Partisë Demokratike dhe Partisë Bashkimi për të Drejtat e Njeriut, në zgjedhjet vendore të 14 majit, PD-ja do të mbështesë kandidatët e PBDNJ-së në tri bashki: Himarë, Dropull dhe Finiq.