Në mënyrë të veçantë, në një intervistë për ERT-në, ministri bëri të qartë se Greqia do të bllokojë çdo financim europian për Shqipërinë, për sa kohë të zgjasë çështja Beleri, duke sqaruar se “Shqipëria do të harrojë paratë nga Europa nëse Fredi Beleri nuk betohet si kryebashkiaku i Himarës”.
Ai shtoi se nëse zgjedhjet përsëriten ose betohet një kryetar tjetër bashkie, “për Greqinë do të jetë faktor i keq i marrëdhënieve me Shqipërinë për një periudhë të pacaktuar”.
“Shqipëria do të paguajë një çmim shumë të lartë nëse vazhdon të shkelë të drejtat e grekëve të Vorio-Epirit”, shtoi ai, duke vënë në dukje se Shqipëria duhet të rishikojë qëndrimin e saj.
Mungesa e Ramës në takimin e liderëve të Ballkanit Perëndimor në Athinë është një “mesazh” i qartë. Duke folur për rëndësinë e takimit të liderëve të Ballkanit Perëndimor në Athinë, Georgiadis theksoi se “e konsideroj shumë të rëndësishme që Rama nuk është ftuar”.
“Vendimi i Kyriakos Mitsotakis për të ftuar të gjithë të tjerët, përveç Ramës dhe që të gjithë të tjerët të jenë veç Ramës, mendoj se tregon se çështja e Fredi Belerit nuk po kalon aspak pa pengesa në qeverinë greke”, tha ministri.
Në fakt, ai komentoi se “ata që menduan se Kyriakos Mitsotakis do të rezultonte një kryeministër i butë në reagimin e tij për këtë çështje, kanë gabuar”.
“Mesazhi për Shqipërinë sot është i qartë. Nëse vazhdojnë të pengojnë betimin e kryetarit të ri të bashkisë së Himarës Fredi Beleri, do të duhet të harrojnë kursin e tyre evropian dhe paratë nga Evropa”, tha ministri grek Adonis Georgiadis.
- Tensionet Shqipëri – Greqi
Në Athinë sonte pritet të mbahet darka informale e liderëve të Ballkanit Perëndimor, e organizuar nga kryeministri grek Kyriakos Mitostakis.
Shqipëria ka qenë e ftuar në nivel presidenti, por siç ka bërë me dije Presidenca, Bajram Begaj ka refuzuar pjesëmarrjen duke vetë-përjashtuar Shqipërinë nga ky takim dhe duke shtuar tensionet mes Shqipërisë dhe Greqisë. Presidenti ukrainas, Zelensky pritet të marrë pjesë në darkën informale në Athinë me krerët e Ballkanit Perëndimor. Në këtë takim, të organizuar nga kryeministri grek Mitsotakis nuk është ftuar kryeministri Rama ndërsa Begaj refuzoi ftesën.
Në darkën informale në Athinë do të marrin pjesë edhe liderët e vendeve të rajonit që janë anëtare të BE-së kryeministrat bullgarë, kroatë dhe rumunë si dhe presidentja e KE Ursula von der Leyen dhe presidenti i Këshillit të Evropës Charles Michel.
Ishin mediat greke që njoftuan të parat për darkën informale të Mitsotakis, ku “Prothotema” shkruante se kanë konfirmuar pjesëmarrjen presidenti serb Aleksandar Vuçiç, kreu i shtetit të Malit të Zi, Jakov Milatovic, kryeministri i Maqedonisë së Veriut, Dimitar Kovacevski dhe shefi i qeverisë së Kosovës Albin Kurti.
Mospjesëmarrja e Shqipërisë në darkë, vjen në një kohë kur Tirana dhe Athina zyrtare janë përplasur për çështjen e Fredi Belerit.
Nga njëra anë është qeveria greke që kërkon lirimin nga qelia të kryebashkiakut të Himarës dhe nga ana tjetër qëndrimi i pandryshuar i Ramës, i cili arrestimin dhe hetimin e Belerit në akuzë për blerje të votave, e quan çështje të drejtësisë në të cilën Greqia nuk duhet të ndërhyjë.
