Kryetari i opozitës, Sali Berisha, e ka vazhduar fjalën e tij sot në foltoren e Kuvendit, në një sallë të zhytur në errësirë nga Nënkryetarja e Kuvendit, Ermonela Felaj, e cila u largua sëbashku me ministrat dhe deputetët e PS-së duke ndërprerë edhe energjinë elektrike në sallë për të mos lejuar vazhdimin e protestës së demokratëve.
"Siç e shihni, si një grup gangsterësh dhe jo parlamentarësh, fikën dritat dhe u larguan, - tha Berisha. - Por natyrisht me këtë akt dëshmuan edhe njëherë se çfarë përfaqësojnë.
Në parlament ju garantoj se do të zhvillohet një nga betejat më të fuqishme në historinë e demokracisë shqiptare, e cila sot është një fiktivitet.
Ju, me kurajën votuat kundër qeverisë. Kundër një qeverie e cila ka rekordet më të zeza në vjedhjen, varfërimin dhe mjerimin e shqiptarëve. Ka rekordet më të zeza në lidhje me krimin dhe drogën. Ka rekordet më të zeza në pasurimin e kryeministrit, ministrave dhe familjarëve të tyre me pasuritë publike dhe fondet e buxhetit të shtetit. Ka rekordet më të zeza me lidhjet me grupet e drogës nga Sinaloa e Meksikës që sot është kryekarteli i botës te grupet në Ekuador dhe në vende të tjera. ka rekordet më të zeza në liritë dhe të drejtat e qytetarëve, dhunimin masiv të votës."
