SHBA - Të paktën 22 persona kanë vdekur dhe dhjetëra janë plagosur pas dy të shtënave të mërkurën mbrëma në një sallë bouling dhe një restorant në Leëiston, Maine, thanë autoritetet amerikane. Sipas zyrtarëve, është duke u kryer një ndjekje intensive për një person të lidhur me të shtënat, njofton CNN.
Robert Card, 40 vjeç, nga Boëdoin, është një person që duhet të konsiderohet i armatosur dhe i rrezikshëm, tha Komisioneri i Departamentit të Sigurisë Publike në Maine, Mike Sauschuck.
Card kishte bërë së fundmi kërcënime për të kryer vrasje në një strukturë të Gardës Kombëtare në Saco, Maine, dhe gjithashtu raportoi se kishte probleme të shëndetit mendor, përfshirë dëgjimin e zërave, thanë zyrtarët.
Ndërsa Reuters shkruan se: "Qindra policë kontrolluan qytetin e Lewiston dhe zonat përreth të shtetit Maine për një burrë të kërkuar në lidhje me të shtënat masive në një bar dhe një sallë bouling, ndërsa mediat raportuan një numër të vdekurish që varionin nga 16 në 22 dhe me dhjetëra të tjerë të plagosur.
Zyrtarët thanë se kishte shumë viktima, por nuk pranuan të japin shifra.
Policia e shtetit dhe ajo vendore amerikane identifikuan Robert R. Card, 40 vjeç, si një person me interes për rastin, pasi kishte postuar më parë në Facebook fotografi të një burri që mbante atë që dukej të ishte një pushkë gjysmë automatike.
Fotografitë nga një nga skenat e krimit të së mërkurës tregonin një burrë me mjekër me bluzë me kapuç ngjyrë kafe dhe xhinse, duke mbajtur armën në pozicionin e qitjes.
