Ndërsa opozitës i sugjerohet adresimi i kërkesave në Gjykatën Kushtetuese, sot me forcën e kartonit, deputetët e Partisë Socialiste vendosën kundër vendimeve të Gjykatës Kushtetuese. Me 75 vota u rrëzua propozimi i opozitës për reflektimin në Kodin Penal të vendimit të Gjykatës Kushtetuese për tubimet. Deputeti i Partisë së Lirisë, Petrit Vasili, e cilësoi këtë votim, kapje të Gjykatës Kushtetuese nga qeveria. I pyetur nga Syri TV për kontradiktën mes deklaratave dhe votimit kundër vendimit të Kushtetueses, kreu i grupit parlamentar socialist, Bledi Çuçi, zgjodhi të justifikohej
SYRI TV
Ndërsa i bënin thirrje opozitës që kërkesat e tyre t’i dërgojnë në Gjykatën Kushtetuese, krejt e kundërta ndodh me forcën e kartonit pikërisht për vendimet e Gjykatës Kushtetuese.
Në seancën e sotme ishin futur në rend dite edhe ndryshimet e Kodit Penal, diktuar nga vendimi i Gjykatës Kushtetuese sa i përket të drejtës për tubimet. Por përtej propozimeve të opozitës për ndryshimet ligjore, deputetët socialistë vendosën rrëzimin e ndryshimeve ligjore.
Pas këtij votimi, deputeti i Partisë së Lirisë, Petrit Vasili, u shpreh se mazhoranca socialiste konfirmoi sot kapjen edhe të Gjykatës Kushtetuese.
I pyetur nga gazetari i Syri TV, kreu i grupit parlamentar Bledi Çuçi, se teksa i sugjerojnë opozitës adresimin në Kushtetuese, sot me forcën e kartonit vendosën kundër Gjykatës Kushtetuese me rrëzimin e propozimit të deputetëve të Partisë së Lirisë për ndryshime në Kodin Penal, në zbatim të vendimit të Kushtetueses për tubimet.
Por, në këtë rast, z. Çuçi u justifikua se vendimi po zbatohet, por në ligj do të përkthehet më vonë.
Me këtë votim, theksoi Vasili, mazhoranca rrëzoi pretendimet e saj për kushtetueshmëri, ndërsa me forcën e kartonit u rrëzua edhe ligji tjetër i propozuar po nga opozita për taksat kombëtare, çka do të sillte uljen e çmimit të karburantit.
