Në profilin e gazetës thuhet se ky dënim shënon ‘rënien e ish-shefit të kundërzbulimit të FBI-së’. 

Prokuroria ka kërkuar 5 vite burg për dosjen ruse të McGonigal, ndërkohë që vendimi për dosjen shqiptare të McGonigal do jepet në fillim të vitit tjetër.

Në shkrimin e ‘Wall Street Journal’ përmendet edhe lidhja e ngushtë e McGonigal me Edi Ramën.

“Prokurorët thonë se rënia nga agjent kryesor në një të dënuar federal nisi në vjeshtën e vitit 2017, ndërsa McGonigal po priste të tërhiqej nga posti i tij i fundit si shef i kundërzbulimit të zyrës së Nju Jorkut.

Ai udhëtoi në Shqipëri atë shtator dhe u takua me kryeministrin e vendit, një kontakt potencialisht i vlefshëm për biznesin e konsulencës për sigurinë që ai planifikonte të hapte. Si shenjë e vlerësimit të tij, McGonigal i la kryeministrit shqiptar një plaçkë: një kapele të FBI-së.

Ditë më vonë, ai udhëtoi me makinë në Kosovë dhe përsëri i dhuroi një kapele të FBI-së një politikani, thanë prokurorët. Ai udhëtim kishte për qëllim mbledhjen e informacionit jo vetëm për FBI-në, por edhe për ‘planin e zhvillimit të biznesit personal të pazbuluar’ të McGonigal, thanë prokurorët.

Brenda disa javës, në një makinë të parkuar jashtë një restoranti në Nju Jork, McGonigal mori rreth 80 mijë dollarë në para të thata nga një ish-oficer i inteligjencës shqiptare, si pjesë e një borxhi që ai kishte kërkuar.

Ai më vonë bëri një deklarim në FBI për udhëtimin e tij në shtator të vitit 2017, por nuk përmendi se ishte takuar me kryeministrin shqiptar dhe politikanin kosovar.

McGonigal pranoi se fshehu marrjen e parave dhe nuk i zbuloi takimet me zyrtarët e huaj, në një deklaratë të pranimit të fajit që dokumentonte se si ai kishte ndërthurur detyrën e tij në FBI me interesat personale të biznesit,” shkruan gazeta amerikane.