Në aktivitetin e hapjes së garës për ndërtimin e portit të ri në Porto Romano, ka qenë i pranishëm dhe kryeministri Edi Rama.

Porti i ri pritet të kushtojë 390 milionë euro nga paratë e taksapaguesve shqiptarë, edhe pse në fillim ishte premtuar ndryshe. 

Kryeministri Edi Rama mbrojti aferën e tij me portin aktual të Durrësit, që pritet të kushtojë miliarda euro.

Rama tha se ky port duhej të shkatërruar sepse ishte kthyer në një plagë sociale dhe ekonomike.

“E shkuara është një barrë shumë e madhe, e shkuara jonë është njësoj si porti i Durrësit në qendër të qytetit. Një port që është një plagë, plagë mjedisore, një plagë fizike që ka bërë në vazhdimësi dëm të madh për perspektivën dhe imazhin, por edhe një plagë në aspektin socio-ekonomik sepse e dimë shumë mirë se gjithë ai kaos për shumë vite ka qenë një zonë e errët e veprimtarive të paligjshme dhe kriminale,” tha Rama.

Kryeministri vazhdoi të kërkojë pranonë e NATO-s në portin e ri, si një mënyrë për ta implikuar edhe aleancën ushtarake në mega-aferën e tij.

“Ky do të jetë një port që do të impaktojë dhe sigurinë tonë. Do të ketë dhe krahun e vet ushtarak, duke i ofruar NATO-s një bazë të re ushtarake, jo thjesht të re në numër, por një bazë ushtarake me parametra optimalë. Ky port është një port i ri në Evropë pas shumë dekadash. Ne kemi fatin që duke qenë në fund të kësaj kolone të gjatë, të marrim dhe përfitimin e një dije që është krijuar në vite dhe në aspektin mjedisor dhe në atë të gjelbër të kemi një port që do të jetë një shembull ekselence,” tha Rama.