Departamenti "Brain Gain" i Partisë Demokratike organizoi një aktivitet shumëngjyrësh në Ditën Botërore të Rinisë. Godina e Partisë Demokratike u shndërrua në një hapësirë ekspozimi e muzike për studentët e Universitetit të Arteve, të cilët kërkuan më shumë galeri e vende për të paraqitur veprat, dhe vëmendje e mbështetje të institucioneve shtetërore për artistët. 

Prej kohësh e shndërruar në një godinë ëndërrimesh për njerëzit e lirë e në veçanti për artistët, selia e Partisë Demokratike ka mirëpritur studentët e Arteve, ndërsa veprat e tyre flasin për "Disa ëndrra" kuruar nga Arnold Broqi, në Ditën Botërore të Rinisë. 

Departamenti "Brain Gain" organizoi një aktivitet artistik, si himn për t'iu qasur së bukurës, por edhe për të realizuar dëshirën e të rinjve të talentuar, për ekspozimin e veprave, ngase prej vitesh Tirana nuk ka hapësira ekspozimi.  

Kultura dhe arti janë fuqi që përligjin ekzistencën shpirtërore, ndaj drejtuesi i Departamentit Brain Gain, Andi Mustafaj u shpreh se artistët do të kenë gjithnjë mbështetjen e Partisë Demokratike. 

25 veprat në pikturë, skulpturë dhe gdhendjet në dru rrokin gjithkohësinë, nga fëmijëria e largët e artistëve te problematikat sociale e shndërrimet e qytetit, që hera herës duket pa jetë i tejmbushur me kulla. Mateo Mosho dhe Diana Bregu thonë se gjëja me e rëndësishme për ta është komunikimi me publikun.

Në përfundim të kundimit të pikturave, të pranishmit u zhvendosën drejt tarracës së godinës, ku shijuan tingujt dhe muzikën e bandës muzikore dhe këngëtares Kentina Shehaj.