Të tjera detaje janë bërë publike në lidhje me arrestimin e ish-deputetit të PS në Durrës Jurgis Çyrbja.

Sipas burimeve të SYRI-t, gazetari Fatjon Gjinaj njofton se Çyrbja rezulton të jetë i përfshirë në përgjimet e SKY në lidhje me bandat kriminale dhe zgjedhjet dhe se bashkë me të është arrestuar edhe Ahmet Masha.

Ish-deputeti i PS, u vu në pranga pak ditë pasi dorëzoi mandatin i cili u zëvendësua nga KQZ dhe u mor i pandehur nga SPAK për “shpërdorim detyre”, për një çështje në kohën kur ishte drejtues i Hipotekës së Durrësit, e denoncuar nga ish-drejtuesi politik i PD-së për Qarkun e Durrësit, Edi Paloka në zgjedhjet e vitit 2021.

Burime bëjnë me dije se socialisti dyshohet se ka qenë edhe përdorues i aplikacionit SKY ECC dhe se ka pasur aty komunikime me personazhe të botës së krimit në Durrës.

Ndërkohë, në një njoftim zyrtar për mediat, Prokuroria e Posaçme kundër Korrupsionit dhe Krimit të Organizuar ka zbardhur akuzat ndaj tij.

Sipas SPAK, Çyrbja akuzohet për tre vepra penale, “Korrupsioni aktiv në zgjedhje”, “Përkrahja e autorit të krimit”, si dhe “Tregëtimi i sekretit shtetëror nga shtetasit”.

Mësohet se ndaj tij Gjykata e Posaçme e Shkallës së Parë për Korrupsionin dhe Krimin e Organizuat ka caktuar masen e sigurimit “arrest në burg”.

‘Nisur nga interesi i madh i mediave ju komunikojmë se Policia e Shtetit ka ekzekutuar sot masën e sigurimit arrest në burg të caktuar nga Gjykata e Posaçme e Shkallës së Parë për Korrupsionin dhe Krimin e Organizuat ndaj shtetasit Jurgis Çyrbja, si i dyshuar për kryerjen e veprave penale të “Korrupsioni aktiv në zgjedhje”, parashikuar nga neni 328 i Kodit Penal; “Përkrahja e autorit të krimit”, parashikuar nga neni 302/1/2 të Kodit Penal si dhe “Tregëtimi i sekretit shtetëror nga shtetasit” parashikuar nga neni 295/1 i Kodit Penal. Nesër do të ketë një njoftim për shtyp me më shumë detaje’, thuhet në njoftimin e SPAK.