'Rezoluta më e fuqishme kundër regjimit', e ka cilësuar lideri i së djathtës shqiptare, Sali Berisha, miratimin nga Internacionalja e Qendrës Demokrate, e cila sipas tij është bërë në unanimitet të plotë dhe në mbështetje të opozitës shqiptare.

Duke folur para mbështetësve të tij në ditën e 322 të arrestit politik, Berisha tha se miratimi i rezolutës, është dënimi më ekzemplar që CDI-ja, ia rezervoi narko-diktaturës së Edi Ramës. 

Kryedemokrati Berisha garantoi partitë e djathta internacionale se beteja kundër narko-regjimit, do të jetë betejë fitimtare. 

Miqtë e mi, sot paradite Internacionalja e Qendrës Demokrate, organizata që grupon së bashku 108 parti politike nga të gjitha kontinentet, organizatë planetare, ka folur në një seancë më fuqishëm se kurrë ndonjëherë ndokush për secilin prej jush, për Opozitën shqiptare, për narko-diktaturën e Edi Ramës, për narko-drejtësinë e tij.

Pra, sot është miratuar rezoluta më e fuqishme kundër regjimit në Shqipëri. Që nga koha e Enver Hoxhës, sot është miratuar me unanimitet të plotë, pa asnjë kundërshtim nga përfaqësues të këtij forumi botëror, planetar rezoluta në mbështetje të Opozitës shqiptare, të çdo opozitari të këtij vendi, të demokracisë.

Ndaj dhe, të dashur miq, në emër tuaj të shpreh mirënjohjen më të pakufijshme ndaj përfaqësuesve të këtij forumi botëror të partive politike në këtë forum botëror për këtë mbështetje të madhe që i dhanë Opozitës shqiptare, për këtë dënim ekzemplar që i rezervuan narko=diktaturës së Edi Ramës.

I garantoj në emër tuajin se, beteja jonë kundër narko-regjimit do të jetë betejë fitimtare.