Saimir Tahiri ka dorëzuar sot mandatin e deputetit, akt që e kthen në qytetar të thjeshtë, pa mburojë të posaçme juridike para Prokurorisë dhe Gjykatës. Në rast të një arrestimi eventual të ish-deputetit socialist, çfarë ndodh me Komisionin parlamentar ‘Tahiri’ të ngritur me nismën dhe kërkesën e opozitës? A bëhet i panevojshëm ky Komision duke e çuar në nul aktivitetin e tij?

Flamur Noka, anëtar i këtij Komisioni, mendon të kundërtën. I kontaktuar nga Politiko.al, deputeti demokrat sqaron se Komisioni do të vazhdojë punën pa ndërprerje, edhe në rast të arrestimit të Saimir Tahirit. “Nuk ka mospërputhshmëri mes punës së Komisionit dhe aktivitetit të Prokurorisë”, sqaron ai duke shtuar se puna e Komisionit  nuk përplaset me atë të organeve të drejtësisë, sepse misionet janë të ndryshme.

Deputeti i opozitës shpjegon se Komisioni është ngritur për të kërkuar shkaqet e kanabizimit të vendit dhe përfshirjen në të të një funksionari të lartë shtetëror, siç është ish-ministrit Tahiri. “Çdo fakt apo grup faktesh ne ia dorëzojmë Prokurorisë, por qëllimi i Komisionit shkon përtej Saimir Tahirit”. Noka shton se Komisioni parlamentar është një mekanizëm kushtetues që ka opozita dhe mund të ngrihet për dy arsye: për një çështje apo hetimin e personave me imunitet parlament. /Politiko.al/